Huna urte berria - DUNATE

   Huna urte berria, bide baten pare,

    Hartu behar duguna xuxen jakin gabe

    Zeri buruz gaituen eremaiten ote,

    Urus hortaratzea oraino halere.

    Bihotzean izanez azkar eta erne

    Heldu denari buru egin baititake,

    Jaunak eman dezala orori bertute:

    Dituztan agiantzak denak hortan daude.

    Hari egin galdeak galduak ez daude,

    Giren bezalakoak zinez gaitu maite:

    Egun oroz gurekin dago bidez-bide,

    Segurrean egina leial laguntzaile.

    Gurekin dagonari otoitzean gaude,

    Hura dugulakoan biziaren jabe:

    Eman diezagula argi eta bake

    Izaiteko orotan ongiaren alde.

    Izan dadin guretzat egin begirale

    Eman nahi diogu maitasunez fede:

    Harekin dabiltzanak hautsi ez ditazke,

    Laguntza haundienak segur baitauzkate.

Beñadin Dunate Apeza